Noutbukun televizora qoşulması üçün 5 üsul:
simli və simsiz şəkildə
Böyük ekranda seriallara baxın, oyun oynayın və təqdimat göstərin.
25.05.2026 | ~8 dəq.
Gözləriniz noutbukun balaca ekranından yorulduqda, onu televizora qoşun. Böyük ekranda necə oyunu davam edəcəyiniz və ya seriala baxacağınız barədə danışırıq.
Qoşulmadan öncə nələrə diqqət etmək lazımdır
Noutbuku müxtəlif üsullarla televizora qoşmaq olar. Bunu hansı məqsədlə etmək istədiyinizi müəyyən edin və texnikanızın xüsusiyyətlərini öyrənin ki, ən uyğun metodu seçə biləsiniz.
- • Nə etməyi planlaşdırırsınız. Təqdimat göstərmək, fotoşəkillərə və ya seriala baxmaq istəyirsinizsə, simsiz qoşulma uyğun olacaq. Daha tələbkar oyunlar üçün isə HDMI vasitəsilə sabit simli bağlantı lazımdır ki, görüntü qırılma, donma və ya titrəmə olmadan ötürülsün.
- • Televizorda hansı portlar var. Müasir televizorlarda, bir qayda olaraq, audio və video siqnallarını ötürmək üçün universal HDMI portu olur. 2011-ci ildən sonra istehsal olunmuş bütün Samsung televizorları bu texnologiyanı dəstəkləyir. Köhnə TV modellərində VGA və DVI üçün portlara rast gəlmək olar — onlar yalnız video siqnal ötürür.
- • Noutbukda hansı portlar var. Adətən, noutbuklarda fleş kartlar, siçanlar və klaviaturalar üçün standart USB portları olur –– onlar vasitəsilə TV-ə qoşulmaq olar, lakin adapter lazım olacaq. Windows-la işləyən əksər noutbuklarda kənar monitorların qoşulması üçün xüsusi port da olur. Ondan istifadə edərək də ekran yayımını həyata keçirmək olar. Ən çox yayılmış port –– HDMI portudur, VGA və DVI isə daha az rast gəlinir.
Kabel vasitəsilə noutbuku necə televizora qoşmaq olar
Noutbukun parametrlərinə girmək istəmirsinizsə, ən sürətli variant cihazın kabel vasitəsilə TV-ə qoşulmasıdır.
HDMI vasitəsilə
HDMI — müasir TV-lərdə ən çox yayılmış qoşulma növüdür. O, audio və video siqnallarını ötürür, həmçinin versiyasından asılı olaraq görüntünü müxtəlif qətnamələrdə yayımlaya bilir.
Beləliklə, Full HD üçün 1.4 versiyalı kabel kifayət edir. Filmləri 4K qətnaməsində izləmək üçün (məsələn, Neo QLED televizorunda) HDMI 2.0 tələb olunur. Əgər televizor 8K qətnaməsini dəstəkləyirsə, HDMI 2.1 lazım olacaq.
|
HDMI versiyası |
HDMI 1.4 (High Speed) |
HDMI 2.0 (Premium High Speed) |
HDMI 2.1 (Ultra High Speed) |
|---|---|---|---|
|
Qətnamə |
Full HD |
4K |
8K |
Kabelin versiyasını qutunun üzərindəki markalanmaya əsasən müəyyən etmək olar. Bəzən bu məlumat kabelin özünün üzərində də qeyd olunur. HDMI versiyasını seriya nömrəsi vasitəsilə də öyrənmək mümkündür: adətən, seriya nömrəsi qutunun və ya kabelin üzərində yazılır. Nömrəni axtarış sətrinə daxil edin və həmin kabeli satan istənilən mağazanın saytına keçin. Məhsulun xüsusiyyətləri bölməsində onun versiyası haqqında məlumat tapa bilərsiniz.
Noutbuku HDMI vasitəsilə necə televizora qoşmaq olar
- 1. HDMI kabelini noutbuk və TV portlarına istənilən qaydada qoşun – kabelin hər iki tərəfi eynidir.
- 2. Pultda Source və ya Input düyməsini basın. Daha sonra mənbə kimi HDMI və ya PC-ni seçin.
- 3. Windows əməliyyat sistemi ilə işləyən kompüterdə Win+P düymə kombinasiyasını basın və lazım olan rejimi seçin.
Noutbukun televizora qoşulması üçün 4 rejim mövcuddur:
- • «Yalnız kompüter ekranı»: görüntü TV-ə ötürülmür. Noutbukda nəyisə tez etmək lazım olduqda bu rejimə keçmək rahatdır.
- • «Dublikat»: eyni görüntü həm TV-də, həm də noutbukda göstərilir. Bu rejim təqdimatlar keçirmək və ya şəkilləri nümayiş etdirmək üçün uyğundur.
- • «Genişləndir»: TV ikinci iş masasına çevrilir. Məsələn, təqdimatı televizorun ekranında açmaq, eyni zamanda noutbukda isə konspektə baxmaq olar. Siçan kursorunu bir iş masasından digərinə keçirmək üçün onu sağa və ya sola son həddə qədər aparmaq kifayətdir.
- • «Yalnız ikinci ekran»: görüntü yalnız TV-də yayımlanır, noutbukun ekranı isə, sönür. Filmlərə və seriallara baxmaq üçün uyğundur.
DVI vasitəsilə
DVI yalnız video siqnalın çıxarılması üçün istifadə olunan və 2K qətnaməsini dəstəkləyən standart interfeysdir. HDMI yarandıqdan sonra DVI, demək olar ki, artıq istifadə olunmur.
Televizorun DVI portu, noutbukun isə, HDMI portu varsa, adapter və ya konverter vasitəsilə qoşulmaq olar. Bununla belə, görüntünün keyfiyyəti pis ola bilər: DVI siqnalı HDMI-ə çevrilir, bu isə, maneələrin yaranmasına səbəb ola bilər.
Televizora konverter qoşun, HDMI kabelinin bir ucunu ona, digər ucunu isə, noutbuka taxın. Sonra «Noutbuku HDMI vasitəsilə necə televizora qoşmaq olar» bölməsində göstərilən təlimata riayət edin.
VGA vasitəsilə
VGA — TV-ni noutbuka qoşmaq üçün istifadə olunan ən köhnə portlardan biridir və tədricən istifadədən çıxır. Bu port yalnız video siqnal ötürür və Full HD qətnaməsini dəstəkləyir.
Televizorda yalnız VGA portu varsa, onu adapter və ya HDMI → VGA konverteri vasitəsilə HDMI portu olan noutbuka qoşmaq olar. Daha sonra «Noutbuku HDMI vasitəsilə televizora necə qoşmaq olar» bölməsindəki təlimata əməl edin.
USB vasitəsilə
Noutbukunuzda yalnız universal USB portları varsa, USB → HDMI adapterindən istifadə etmək olar. Adapterin bir tərəfini USB portu vasitəsilə noutbuka, digər tərəfini isə HDMI kabeli ilə TV-yə qoşmaq lazımdır. HDMI portu universaldır, yəni həm görüntünü, həm də səsi ötürür.
Noutbuku simsiz necə
televizora qoşmaq olar
Ailənizlə kinoya və ya yaxınlarda getdiyiniz səfərdə çəkdiyiniz fotoşəkillərə baxmağı planlaşdırırsınızsa, noutbuku TV-ə simsiz şəkildə qoşun. Wi-Fi sabit və sürətli olduqda, kontent hətta 4К qətnaməsində belə yüklənir.
Samsung üçün tətbiq vasitəsilə
Noutbuku Samsung televizorlarına, məsələn, QLED-ə, Easy Connection to Screen tətbiqi vasitəsilə qoşmaq olar.
1-ci addım. Noutbukun və Samsung televizorunun eyni Wi-Fi şəbəkəsinə qoşulu olduğundan əmin olun.
2-ci addım. Noutbuka Easy connection to screen tətbiqini quraşdırın, daha sonra isə, Samsung hesabına daxil olun.
3-cü addım. TV-də Smart Hub menyusunda «Mənbə» bölməsini seçin, daha sonra isə, «TV-də kompüter» düyməsinə basın.
4-cü addım. «Windows kompüteri» bölməsini seçin və açılacaq təlimatla tanış olun.
5-ci addım. Noutbuk işarəsinə klikləyin — o, «Cihazlar» bölməsində görünəcək.
Ekranın dublikatı vasitəsilə
Bir çox Smart TV-yə ekranın dublikatı (Screen Mirroring) funksiyası vasitəsilə qoşulmaq olar. Bu texnologiya Miracast kimi də tanınır. Müasir noutbukların əksəriyyəti onu dəstəkləyir.
Qoşulma üçün kabellər və ya marşrutizatorlar tələb olunmur. Sadəcə iki cihaz lazımdır – noutbuk və televizor.
- 1. Smart TV-də şəbəkə və ya Wi-Fi parametrlərində Miracast funksiyasının aktiv olduğunu yoxlayın.
- 2. Noutbukda Win+K düymələrini basıb saxlayın və öz TV-nizi seçin.
- 3. Cihazların siyahısında TV yoxdursa, parametrlər vasitəsilə «Bluetooth və digər cihazlar» bölməsinə keçin və «Cihaz əlavə et» düyməsinə basın. Sonra «Simsiz displeylər və dok-stansiyalar» bölməsini seçin və noutbuku qoşmaq istədiyiniz televizorun adının üstünə basın.
- 4. TV-də qoşulma sorğusu çıxacaq — «İcazə ver» düyməsinə klikləyin.
Yeganə mənfi cəhət odur ki, Miracast vasitəsilə simsiz qoşulma qeyri-sabit ola bilər. Buna görə filmlərin ötürülməsi zamanı görüntü dona və gecikmə ilə göstərilə bilər.
Səs və ya görüntü olmadıqda
nə etmək lazımdır
Bəzən, hətta TV-yə qoşulduqdan sonra belə, səs noutbukdan gəlir və ya nədənsə ekran dublikat olunmur. Problemlərin səbəblərini araşdırır və onların necə aradan qaldırılacağını izah edirik.
Səs yoxdur
Səbəb 1. Yanlış audio çıxışı. Win+Ctrl+V düymələrini basıb saxlayın və ya parametrlərdə «Sistem» bölməsinə keçin, sonra «Səs» bölməsini seçin. Çıxış cihazları arasında televizorunuzun adını seçin.
Səbəb 2. Lazımi səs drayveri yoxdur. Win+X düymələrini basın və açılan menyudan «Cihaz meneceri» bölməsini seçin. «Səs, oyun və video cihazları» bölməsinə keçin. Daha sonra High Definition Audio Device üzərinə sağ klikləyərək «Drayveri yenilə» seçiminə basın.
Görüntü düzgün əks olunmur və ya ümumiyyətlə yoxdur
Səbəb 1. Yanlış ötürmə rejimi. Windows əməliyyat sistemi ilə işləyən noutbukda Win+P düymə kombinasiyasını basın və lazım olan rejimi seçin:
- • «Yalnız kompüter ekranı»;
- • «Dublikat»;
- • «Genişləndir»;
- • «Yalnız ikinci ekran».
Hər bir rejim haqqında ətraflı məlumatı «Kabel vasitəsilə noutbuku televizora necə qoşmaq olar» bölməsində oxuya bilərsiniz.
Səbəb 2. Yanlış HDMI portu seçilib. Televizorun arxa panelində bir neçə HDMI port ola bilər: HDMI 1, HDMI 2 və s. Kabelin hansı porta qoşulduğunu yoxlayın. Daha sonra televizorun menyusunda, yaxud Input və ya Source düyməsi vasitəsilə həmin portu siqnal mənbəyi kimi seçin.
Səbəb 3. Noutbukun drayveri köhnəlib. Win+X düymələrini basın və açılan menyudan «Cihaz meneceri» bölməsini seçin. «Video adapterləri» bölməsinə keçin. Daha sonra videokartın adının üzərinə sağ klikləyin və «Drayveri yenilə» seçiminə basın.
Filmləri yüksək keyfiyyətdə izləmək üçün televizorlar
QLED 4K televizorları
Neo QLED 8K televizorları
Zərif The Frame televizorları
