Tiranë, 7 korrik 2025 – Samsung Electronics njoftoi sot një seri të re përditësimesh për sigurinë dhe privatësinë, të cilat do të jenë të disponueshme me smartfonët e ardhshëm Samsung Galaxy që vijnë me One UI 8. Këto përditësime përforcojnë angazhimin e Samsung për të ofruar teknologji mobile të fuqishme dhe të besueshme, në një botë digjitale që ndryshon me shpejtësi – duke sjellë mbrojtje të reja për AI-në në pajisje, zgjeruar detektimin e kërcënimeve ndër-pajisje dhe duke përmirësuar sigurinë e rrjetit përmes enkriptimit të qëndrueshëm ndaj teknologjisë kuantike.

 

Siguria mobile e gjeneratës së re për një eksperiencë të personalizuar me Galaxy AI

 

Samsung prezanton Knox Enhanced Encrypted Protection (KEEP),[1]– një arkitekturë e re e ndërtuar për të mbrojtur gjeneratën e ardhshme të veçorive të personalizuara të fuqizuara nga inteligjenca artificiale (AI), si risia më e fundit në sigurinë mobile. KEEP krijon mjedise të enkriptuara dhe të dedikuara për secilin aplikacion brenda hapësirës së sigurt të pajisjes, duke siguruar që çdo aplikacion të ketë akses vetëm në informacionin e tij të ndjeshëm – dhe jo më shumë.

 

Në mbështetje të motorit Personal Data Engine (PDE)[2] të Galaxy, KEEP ndihmon në mbrojtjen e të dhënave shumë personale të përdoruesit – si rutinat apo preferencat – që fuqizojnë funksione si Now Brief dhe Smart Gallery search. Këto të dhëna qëndrojnë tërësisht në pajisje, të mbrojtura nga KEEP dhe të siguruara më tej nga Knox Vault, ambienti i sigurisë fizike i Samsung, rezistent ndaj ndërhyrjeve. Rezultati është një bazë solide për Galaxy AI që ofron inteligjencë të personalizuar, duke mbajtur të dhënat të mbrojtura dhe nën kontrollin e përdoruesit.

 

Struktura e KEEP në nivel sistemi e bën atë të shkallëzueshme për të gjitha risitë e Galaxy AI. Përveç PDE, tani KEEP mbron edhe Now Brief, Smart Suggestions dhe veçori të tjera që funksionojnë bazuar në të dhëna specifike të përdoruesit – duke mundësuar eksperienca më të avancuara me AI, pa komprometuar privatësinë. Me KEEP, Samsung po riformulon mënyrën se si pajisjet mobile mbrojnë të dhënat në sfond – duke e kthyer privatësinë nga një opsion, në një parim të integruar të dizajnit.

 

Reagim më i zgjuar dhe më i lidhur ndaj kërcënimeve me Knox Matrix

 

Me integrimin gjithnjë e më të madh të AI në ekosistem, Samsung po avancon masat mbrojtëse që ofrojnë jo vetëm siguri më të fortë, por edhe transparencë dhe kontroll më të madh për përdoruesit, me Knox Matrix në qendër të këtij transformimi. Me përditësimin One UI 8, Samsung po e zhvillon më tej Knox Matrix për të ofruar mbrojtje më proaktive dhe më të lehtë për t’u përdorur për të gjitha pajisjet Galaxy të lidhura me njëra-tjetrën. Nëse një pajisje sinjalizohet për një rrezik serioz – si manipulimi i sistemit ose falsifikimi i identitetit – ajo është e programuar për të dalë automatikisht nga llogaria Samsung, duke ndërprerë aksesin në shërbimet e lidhura me cloud, për të parandaluar përhapjen e kërcënimit[3].

 

Përdoruesit njoftohen menjëherë në të gjitha pajisjet Galaxy të lidhura dhe drejtohen në faqen “Security status of your devices”, ku mund të shqyrtojnë problemin dhe të marrin masa. Edhe nëse një pajisje nuk ka përditësimin më të fundit të sigurisë, do të shfaqet një paralajmërim në nivelin e verdhë, që i ndihmon përdoruesit të reagojnë në kohë dhe të shmangin dobësitë e mundshme.

 

Së bashku, këto përditësime e bëjnë mbrojtjen e ekosistemit Galaxy më dinamike, intuitive dhe të dukshme – duke fuqizuar përdoruesit që të ruajnë besimin në pajisjet e tyre me më shumë qartësi dhe siguri.

 

Secure Wi-Fi, tani edhe më i fortë me enkriptim rezistent ndaj kompjuterëve kuantikë

 

Në vazhdim të angazhimit të tij për siguri të qëndrueshme ndaj teknologjisë kuantike, Samsung po sjell kriptografinë post-kuantike në funksionin Secure Wi-Fi[4]– duke zgjeruar qasjen e besuar që u prezantua fillimisht me serinë Galaxy S25 përmes Post-Quantum Enhanced Data Protection (EDP). Secure Wi-Fi tani po përmirësohet me një strukturë të re kriptografike, të krijuar për të forcuar mbrojtjen e rrjetit ndaj kërcënimeve në zhvillim, veçanërisht atyre që priten në epokën e kompjuterëve kuantikë[5]. Ky përmirësim siguron procesin e shkëmbimit të çelësave – thelbësor për lidhjet e enkriptuara – duke ndihmuar në ruajtjen e privatësisë edhe në rrjete publike.

 

Kur kompjutimi kuantik të arrijë potencialin e tij të plotë, ai mund të rrezikojë shumë nga metodat e sotme të mbrojtjes së të dhënave. Me integrimin e kriptografisë post-kuantike, Secure Wi-Fi është ndërtuar për të përballuar sulmet e së ardhmes që synojnë të kapin të dhëna të enkriptuara sot, për t’i deshifruar më vonë kur teknologjia kuantike të jetë mjaftueshëm e avancuar – një taktikë e njohur si “grumbullo tani, deshifro më vonë.” Ky përmirësim forcon tunelin e sigurt midis pajisjeve Galaxy dhe serverëve të Samsung, duke rritur integritetin e transmetimeve të të dhënave, veçanërisht në mjedise me rrezik të lartë si rrjetet publike Wi-Fi.

 

Përveç këtij themeli të përgatitur për të ardhmen, Secure Wi-Fi ofron edhe një paketë funksionesh të avancuara për privatësinë:

• Auto Protect: Aktivizohet automatikisht në ambiente publike si kafene, aeroporte apo hotele, duke siguruar lidhjen Wi-Fi pa pasur nevojë për veprim nga përdoruesi.
• EPP – Enhanced Privacy Protection: Enkripton trafikun e internetit dhe e kalon atë përmes disa shtresave, duke kombinuar enkriptimin e paketave me ridrejtimin për të anonimizuar informacionin e pajisjes dhe për të parandaluar gjurmimin.
• Protection Activity: Ofron transparencë mbi historikun e mbrojtjes, duke treguar cilat aplikacione dhe rrjete janë mbrojtur dhe sa të dhëna janë enkriptuar me kalimin e kohës.

 

Një platformë e besuar me mekanizma të integruar mbrojtës

 

Përveç inovacioneve më të fundit, Samsung vazhdon të forcojë mbrojtjet thelbësore që qëndrojnë në bazë të përvojës Galaxy. Këto veçori pasqyrojnë një qasje me shumë nivele ndaj sigurisë, që mbulon si harduerin, ashtu edhe softuerin, duke u dhënë përdoruesve më shumë transparencë dhe kontroll:

• Knox Vault mbron kredencialet e ndjeshme si fjalëkalimet, PIN-et dhe të dhënat biometrike në një mjedis fizikisht të izoluar, duke ndihmuar në ruajtjen e tyre edhe nëse sistemi operativ komprometohet.

• Auto Blocker ofron mbrojtje të paracaktuar, duke bllokuar instalimet e paautorizuara të aplikacioneve, kufizuar sulmet me komanda dhe reduktuar rrezikun nga kërcënimet “zero-click”.

• Advanced Intelligence Settings u japin përdoruesve mundësinë të çaktivizojnë përpunimin online të të dhënave për veçoritë me AI, në mënyrë që informacioni personal të qëndrojë në pajisje, nën kontrollin e tyre të plotë.

• Enhanced Theft Protection ndihmon në mbrojtjen e të dhënave personale edhe në situata me rrezik të lartë si grabitjet, duke përdorur mekanizma si Identity Check dhe Security Delay për të parandaluar aksesin e paautorizuar.

 

Kjo paketë e fundit përditësimesh forcon angazhimin afatgjatë të Samsung ndaj sigurisë mobile që ndjek hapat e inovacionit. Ajo rrit nivelin e privatësisë në pajisje për AI të personalizuar përmes KEEP, zgjeron transparencën dhe kontrollin për përdoruesit me Knox Matrix, dhe sjell mbrojtje rezistente ndaj teknologjisë kuantike në Secure Wi-Fi – për një përvojë Galaxy më të përgatitur për të ardhmen. Ndërsa sfidat e reja të sigurisë vazhdojnë të shfaqen, Samsung mbetet i përqendruar në ofrimin e zgjidhjeve mbrojtëse që janë të integruara, gjithmonë aktive dhe të gatshme për çdo hap të radhës.

 

 

Rreth Samsung Electronics

Samsung frymëzon botën dhe formëson të ardhmen përmes ideve dhe teknologjive transformuese. Kompania po rishkruan kufijtë e botës së televizorëve, sinjalistikës digjitale, smartfonëve, pajisjeve të veshshme, tabletëve, pajisjeve shtëpiake dhe sistemeve të rrjetit, si dhe në fushat e memories, sistemit LSI dhe prodhimit të çipeve (foundry). Samsung po avancon gjithashtu teknologjitë e imazherisë mjekësore, zgjidhjet HVAC dhe robotikën, ndërsa krijon produkte novatore në industrinë automobilistike dhe atë të audios përmes Harman. Me ekosistemin SmartThings, bashkëpunimet e hapura me partnerët dhe integrimin e inteligjencës artificiale në të gjithë portofolin e tij, Samsung ofron një përvojë të lidhur, inteligjente dhe intuitive. Për risitë më të fundit, vizitoni Samsung Newsroom në news.samsung.com.